![Image](http://sportbild.de/photos/06/12/resize/470x200_420afba2e0fb4b3be82b88ccf52ecb31.jpg)
1992 оны 5 сарын 6. Энэ өдөр хойд Германы нэгэн жижиг баг УЕФА-ын цомтой багуудын цомын тэмцээнд түрүүлж байсан нь эдүгээ хүртэлх багийнх нь түүхэнд тивийн дэвжээнд гаргасан хамгийн том амжилтад нь тооцогддог билээ. Энэ өдрөөс хойш яг 2 долоо хоногийн дараа тэр үеийн супер оддыг бүрэлдэхүүндээ багтаасан Барселон Аваргуудын лигийн түрүүг авч байлаа. Тэгвэл энэ 2 баг олон жилийн дараа хожмын нэг өдөр үхэх сэхэхээ үзэлцэхээр тулгардаг нь энэ юм байжээ. Барса тэр жил аваргалсныхаа дараа жил нь эхний шатанд хэн ч үл мэдэх өчүүхэн багийг 2 тоглолтын нийлбэр дүнгээр 1:0-оор арайхийн буулган авч байсан гэдэг. Гэвч 2 дахь шатанд нь ЦСКА-д хожигдсоноор олон хүний элэг доог болж байсан юм. Энэ удаа тэд аваргын байрнаас үзэлцээд энэ түүхээ давтах уу?
"Үгүй" гэж Роналдиньо хэлж байна. Тэрээр "Дарамт бол бидэнд байнга байдаг зүйл. Гэхдээ бид хожих ёстой. Брэмэныг сайн мэднэ. Тэд хурдан контр хийдэг осолтой хэдий ч бид ялах болно" гэж хэлэв.
"Үгүй" гэж Барсагийн амьд домог, алдарт Иохан Кройф хэлж байна. Тэрээр "Барса бол гэртээ хождог баг. Энэ бол хууль." гэж хэлэв.
"Үгүй" гэж Барсагийн нэгэн үнэнч фэн хэлж байна. Тэрээр "Брэмэн нэг хүн дутуу тоглоно, 12 дэх хүн бол жирийн үед театр шиг байдаг цэнгэлдэхийг чухал тоглолтын үед халуун цусаа асгаруулсан галзуу бухнуудын тулааны газар болгодог юм. Үүнийг Брэмэны фэнүүд санаж айдсаа ясандаа нууж ирвэл арай дээр" гэж хэлэв.
Хэрэв тэд Брэмэныг хожиж чадахгүй бол яах вэ?
"Тэгвэл Райкаардад асуудал үүсэх болно" гэж сонин зардаг хижээл эр харцаа ширүүн болгон хэллээ. Магадгүй түүний Миланд очих зам нь нээгдэх юм. 2009 он хүртэл гэрээтэй хэдий ч хэвлэлүүдийн үгээр бол Милантай сүүжирхээд удаж байгаа билээ. Миланы ерөнхийлөгч Галлиани "Анселотти явбал орыг нь урьд нь манайд тоглож байсан супер оддын нэгээр залгах болно" гэсэн нь бас нэгийг хэлэх мэт. Райкаард тэнд 1988-1993 оны хооронд 5 алтан жилийг үдсэн билээ. Гэвч энэ бүхнийг тоглогчид нь үгүйсгэн байна. Тухайлбал Замбротта "Бид энэ бүхнээс болж солиорох ёсгүй. Зөвхөн Брэмэнтэй хийх тоглолт л бид бүхний анхаарлын төвд байна" гэсэн бол Деко "Бид зөвхөн хожихын төлөө л бүхнээ дайчилна. Брэмэн Клозэ шиг тоглогчийг эгнээндээ багтааж байгаагаараа аюултай баг болсон" гэж хэлсэн. Асар их сонирхол татаж буй энэ тоглолтын өмнө дасгалжуулагчид юу хэлэв ээ?
Райкаард: Брэмэнчүүд их өндөр, бид аль болох стандарт бага өгч, бөмбөгийг доогуур тоглох хэрэгтэй.
Шааф: Довтолгоогоор голлож тоглох болно.
Эндээс харахад аль аль нь өрсөлдөгчөө айхтар судалсан нь илт. Тоглогчдын дундаж өндөр нь Брэмэн 9 см илүү ажээ. Тиймээс Барса бөмбөгөө хавтгайгаар өнхрүүлэх тактикыг сонгох нь. Харин Брэмэн тэнцээ хийх гээд хамгаалалтандаа анхаарвал сагс сагсаар бөмбгөн цэцэг авах тул илүү хүчтэй талаа ашиглан тулалдахаар болсон нь мэдэгдэнэ. Брэмэн хэрэв хожвол тэд багийн түүхэн дэх шилдэг амжилтаа үзүүлээд зогсохгүй дэлхий даяар шагшигдах болно. Ноу Камп тэдний хувьд өөрсдийгөө алдаршуулан дуудуулах төгс газар бүлгээ. Чухамдаа тэднийг халуунаас халуун там хүлээж байгаа. Ювентуст болчимгүй алдаа гаргасан Вийзэ энэ удаад алдаагүй тоглон аваргыг тэмцээнээс шахах бодлогоо нуусангүй. "Барса бидний талаар өмнөхөөсөө хавьгүй илүү төсөөлөлтэй болсон." гэж тэр хэлэв. Энэ төсөөлөл нь Брэмэны спортын захирлын 50 насны төрсөн өдрөөр улам өргөжих эсэхийг бид харахад хоног хүрэхгүй хугацаа үлдлээ...