Монголын хөлбөмбөгийн холбооны (МХБХ) III Их хурал 11 сарын эхээр явагдаж бүтэц бүрэлдэхүүндээ багагүй өөрчлөлт оруулсан. Холбооны ерөнхий нарийн бичгийн даргаар олон жил ажилласан Б.Ганболд энэ хурлаар МХБХ-ны ерөнхийлөгчийн албанд томилогдож харин шинэ генсекээр “Их талын дуулиан” ТББ-ын тэргүүн Д.Тэрбаатар сонгогдсон билээ. Ингээд түүнтэй уулзаж зарим зүйлийг тодрууллаа.
Шинэ албанд томилогдоод багагүй хугацаа өнгөрлөө. Энэ хугацаанд холбооны үйл ажиллагаатай танилцаж цаашид хийх ажлынхаа төлөвлөгөөг гаргаж амжсан байх. Хөлбөмбөг сонирхогчдод МХБХ-ны ирэх онд хийх ажлуудаас товч танилцуулахгүй юу ?
Өнгөрсөн хугацаанд холбооны дотоод үйл ажиллагаатай танилцаж, клубуудын удирлага болон дасгалжуулагчид мөн спортын мастертуудтай уулзалт хийж ирэх оныхоо төсөв төлөвлөгөөг боловсруулж байна. Энэ сарын 15-нд МХБХ-ны удирдах зөвлөлийн хурлаар 2011 оны төсөв төлөвлөгөөг албан ёсоор баталж улмаар 17-нд салбар зөвлөлүүдийн уулзалт болох юм. Ерөнхийдөө ирэх оныг бид сургалтын жил болгохоор төлөвлөж байгаа. Өнгөрч буй жилийн хувьд 16 тэмцээн холбооноос зохион байгуулагдсан бол ирэх онд энэ тоо нилээд өсөх учраас хөлбөмбөг сонирхогчид тэмцээн уралдаанаар цангахгүй гэж найдаж байна. Мөн МХБХ ирэх оноос “Нийслэл лиг”, “Боргио кап”-н явагдах журманд өөрчлөлт оруулж талбайн эзэн-талбайн зочин гэсэн зарчмыг яг олон улсын хэмжээнд нийцсэн ёсоор ашиглах болно. Өөрөөр хэлбэл эдгээр тэмцээнүүдийн үеэр эзэн багаар тоглож клуб ногоон талбайг бүрэн хариуцаж зохион талбайн байгуулалтын асуудлыг зохицуулна гэсэн үг. Энэ нь цаашдаа клубуудыг илүү мэргэжлийн хэмжээнд аваачих, өөрсдийн гэсэн талбайтай болоход дөхөм болно гэж бодож байна. Одоогоор МХБХ-нд харьяалагддаг багуудаас Эрдэнэтийн Хангарьд клуб ганцаараа өөрсдийн гэсэн стандартын талбайтай учраас тэд лигийн тоглолтыг өөрсдийнхөө талбайд хүлээж авах боломжтой. Харин бусад багуудын хувьд хараахан ийм нөхцөл боломж бүрэлдээгүй байгуу учраас холбооны ногоон талбайд тоглолтуудаа хийнэ. Гэхдээ бусад орон нутаг ч олон улсын стандартын талбайтай болчихвол лигийн тоглолтыг өөрсдөө хүлээж авахад нээлттэй гэдгийг хэлмээр байна. 2011 оны лигийн тэмцээн үзэгчдийн санал хүсэлтэд нийцүүлэн ажлын бус цаг буюу 17-19 цагуудын хооронд явагдахаар болсон. Ирэх онд хийгдэх бүтээн багуулалтын ажлын тухайд ногоон талбайн дэргэд өсвөр үе болон идэрчүүдийн тэмцээн явагдах боломжтой шинэ талбайг байгуулах юм. Ингэснээр насанд хүрэгчдийн тэмцээний хажуугаар охидууд, өсвөр үе, залуучуудын тоглолт зэрэг 2 талбайд явагдах боломж бүрдэх юм.
Хөдөө орон нутагт чиглэсэн ямар ажил хийхээр төлөвлөж байгаа вэ ?
Орон нутаг дахь хөлбөмбөгийн хөгжлийг дэмжихийн тулд салбар зөвлөлүүдийг олноор байгуулах, багш дасгалжуулагчидийн сургалт хийх болон улсын аварга шалгаруулах зарим тэмцээнийг орон нутагт зохион байгуулах ажил манай ирэх оны төлөвлөгөөнд багтсан. Эхний ээлжинд Өвөрхангай аймагт заалын хөлбөмбөгийн залуучуудын УАШТ-ийг хийх тухай санал хүргүүлсэн. Мөн Эрдэнэт хотод насанд хүрэгчидийн заалны УАШТ-ийг зохион байгуулах талаар судалж, хүсэлт илгээсэн. Ер нь ямар нэгэн тэмцээн уралдааныг зохион байгуулснаар тухайн орон нутагт хөгжил дагаж ирдэг. Иймээс цаашдаа орон нутагт тэмцээн уралдаан хийх ажлыг эрчимжүүлэх нь зүйтэй.
Одоогоос 4 жилийн өмнө та өсвөрийн хөлбөмбөгчидийн “Дуулиан 2020″ тэмцээний анх үүсгэж байгуулалцаж байсан. Жил ирэх тусам хүрээгээ тэлж байгаа энэ тэмцээний ач холбогдолыг МХБХ ойлгож энэ жилээс хамтран ажиллах болсон нь сайшаалтай. Энэ хамтын ажиллагааны гэрээ ямар давуу талыг авчирч байна вэ ?
Энэ гэрээний давуу тал асар их байна. Яагаад гэвэл хөлбөмбөгийн мэргэжлийн шүүгч болон дасгалжуулагчдийг бэлтгэх үндэс суурь тавигдах боломж эндээс эхлэн бүрдэж байгаа юм. МХБХ-той хамтраад Дуулиан 2020 тэмцээний зохион байгуулагчид саяхан шүүгч болон дасгалжуулагчидийн сургалтыг зохион байгууллаа. Ингэснээрээ Дуулиан тэмцээнд оролцож байгаа сургуулиудын биеийн тамирын багш нар маань илүү мэргэжлийн тал руугаа ажиллаж эхлэх боломж бүрдэж байна. Энэ ажилыг бид цаашдаа үргэлжлүүлж 2011 оны 4 сараас эхлэн БТСГ-тай хамтран Улаанбаатар хотын бүх сургуулиудын биеийн тамирын багш нарыг хамруулсан томоохон сургалтыг зохион байуулахаар төлөвлөж байгаа.
Азийн хөлбөмбөгийн холбооноос (АХБХ)зохион байгуулдаг “Challenge cup” тэмцээний урьдчилсан шатанд манай шигшээ Филиппинтэй оноолт таарсан. Энэ тэмцээнд оролцох багийн бүрэлдэхүүн тодорхой болсон уу ?
МХБХ өнгөрсөн 10 сараас үндэсний шигшээг шинээр бүрдүүлэн шинэ дасгалжуулагч томилон ажиллаж байгаа. Спортын мастер С.Эрдэнэбат шигшээ багийн ерөнхий дасгалжуулагчын албанд томилогдсон. Багийн бүрэлдэхүүнийг сонгохдоо мэдээж хэрэг энэ жилийн үндэсний лигийн тэмцээнд амжилттай оролцсон багуудын тоглочидоос сонгон шалгаруулалт хийж бүрдүүлсэн. Эхний шатанд 46 тоглогчийг сонгож бэлтгэл сургуулилт хийж байгаад дараагийн шатанд 26 тоглогчийг үлдээсэн. Эндээс цаашид “Challenge cup” тэмцээнд оролцох 20 тамирчинтэй эцсийн бүрэлдэхүүнийг оны өмнөхөн зарлах юм.
Тэмцээний өмнө ямар нэгэн нөхөрсөг тоглолт хийх үү ? Шигшээ багийн бэлтгэл сургуулилт ямархуу явж байгаа вэ ?
Тэмцээний бэлтгэлийн тухайд цаг агаарын нөхцөл байдлаас болж зааланд хийгдэж байгаа. 2 сарын 9-нд Филиппиний Манила хотод хийх эхний тоглолтын өмнө хэд хэдэн нөхөрсөг тоглолтууд хийхээр төлөввөсөн. 1 сарын 25-нд шигшээ багийнхан Улаанбаатараас хөдөлж Хятадын Гаунжоу хотод 4 нөхөрсөг тоглолт хийгээд цаашаа Манилад очиж “Challenge cup”-д оролцох юм. Харин хариу тоглолтыг Азийн ХХолбоо анх 2 сарын 26-нд гэж товлосон байсан боловч цаг агаар дулаарсны дараа хийе гэсэн бидний хүсэлтийг хүлээн авч гуравдугаар сарын 15-нд болгож өөрчилсөн байгаа. Гуанжоуд манай шигшээ баг Хятадын үндэсний лигийн багуудтай нөхөрсөг тоглолт хийж бэлтгэлээ базаана. Хятадын хөлбөмбөгийн холбоо бидний хүсэлтийг хүлээн авч мэргэжлийн түвшинд тоглолтыг зохион байгуулахаа амласан. Хэдийгээр эх орондоо бэлтгэл хийж болох байсан ч бид халуун оронд очиж тоглох учраас нилээдгүй зардал гаргаж энэ ажлыг зохион байуулсан.
МХХ-ны урилгаар Азийн ХБХ-ны зааварлагч Кунжи Жамалудеен өнгөрсөн 10 сард манай оронд ирж С ангилалын дасгалжуулагчын сургалт зохион байгуулсан. Ер нь клубуудыг мэргэжлийн түвшинд аваачихын дасгалжуулагч нарын тулд иймэрхүү сургалт олон зохион байгуулах нь зүйтэй байх
Монголын хөлбөмбөгийн холбооны зүгээс зохион байгуулж байгаа тэмцээнд оролцох багуудад бид тодорхой хэмжээний шаардлага тавьж байгаа. Үүнд багуудын дасгалжуулагч нь Азийн ХБХ-ны С зэрэглэл буюу МХБХ-ны B зэрэглэлийн дасгалжуулагчын эрхтэй байх ёстой гэсэн заалт бий. Иймээс дасгалжуулагчдын сургалтыг ирэх онд олон зохион байгуулж бүх мэргэжилтнүүдийг баг удирдах албан ёсны эрхтэй болгох юм.
Холбооны ногоон талбайн хажууд шинээр баригдаж байгаа залны барилгын ажил хэзээ дуусаж ашиглалтанд орох вэ ?
Хүйтнээс болж барилгын ажил одоогоор түр зогссон. Ирэх оны 4 сарын сүүл гэхэд ашиглалтанд орно гэсэн төлөвлөгөөтэй ажиллаж байна. Энэ заал ашиглалтанд орсноор залны тэмцээнүүд явагдах боломжтой болох юм.
Он гараад холбооноос зохион байгуулах анхны тэмцээн юу байна ?
Залуучуудын залны УАШТ 1 сарын 17-ноос 25-ны хооронд явагдахаар төлөвлөгдсөн байгаа.
Холбооны үйл ажиллагаанд хөлбөмбөг сонирхогчид сэтгэл дундуур байдаг нь нууц биш. Ялангуяа олон нийтэд мэдээлэл хүрэх нь бага байдаг болохоор янз бүрийн хэл ам их гардаг. Цаашид нээлттэй ажиллаж мэдээллийг хурдан шуурхай хүргэх тал дээр ямар арга хэмжээ авч байгаа вэ ?
Бид бүхний төлөвлөгөө, журам заавар ном хэлбэрээр 12 сарын 17-нд хэвлэлтнээс гарна. Энэ ажил биелэлээ олсны дараа холбоонд элсэх хүсэлтэй клубууд болон салбаруудыг нээлттэй хүлээж авах ажил хийгдэх юм. Холбооны
www.the-mff.mn сайт мөн энэ сарын сүүлээр ашиглалтанд орох юм. Ингэснээр ХБХ-той бусад мэдээлэл, хуваарь болон хийж байгаа үйл ажиллагааг цаг тухайд нь хөлбөмбөг сонирхогчид хүлээж авах боломжтой болох юм.
Та бүхний ажилд амжилт хүсье