Луис Суарес 2014-15
ДАШТ-ийг бэртлээр эхлүүлж, шийтгэлээр дуусгасан Луисито Барселонд газардлаа. Лигийн түвшинд Мэсси, Роналдугаас ч илүү тоглолт үзүүлж, гайхалтай улирлыг үдээд байсан ч ээлжиж удаагаа хүн хазсанаар түүний нэр хүнд базаахгүй байсан ба Барселон клубын фэнүүд ч энэ наймаанд янз бүрээр харж дүгнэцгээв. Түүний чадварт эргэлзэх зүйл үгүй нь тодорхой, харин түүнийг үгүйсгэх шалтгаанууд голдуу "гурван аваргад нэг бөмбөг цөөднө", "тэнгэрт ганц л нар буй" гэх маягтай. Миний хувьд ганц л айдас байсан нь баг эгондоо хахаж, түүндээ хальтрах вий гэсэн болгоомлол.
Удаан хугацааны хориг хүртсэн Суарес блауграна өмсгөлтэй анхны тоглолт нь Эль Класико болж таарав. Лигийн зүгээс зориуд ингэсэн эсэхийг мэдэхгүй ч үнэхээр хувь заяа гэлтэй. Юутай ч энэ гайхам тохиолын талаар Луисито "Би хувь тавиланд итгэдэг, бурхан учиртай болоод л ингэж тааруулсан байж таарна" гэсээр Мадридын багийн эсрэг тоглолтонд гараанд гарч ердөө 4 дэх минутанд Наймарт гоолын дамжуулалт өгч, гоолын салхийг хагалуулсан. Улмаар Мэссид гоолын боломж гаргаж өгсөн ч хаалганы хажуугаар зөрсөн. Уг тоглолтонд хэдийгээр Реал Мадрид Барсаг илт илүүрхэн хожсон ч Суаресийн хувьд муугүй эхлэл болсон.
Ингэж талбайн гадуурх гунигт сарууд төгссөн бол мөн талбай дээрх хар сарууд эхэлж байж. Өөрийн тоглолтоо олохгүй, гоолоор цангасан тоглолтууд үргэлжиж түүнд эргэлзэж байсны олныг ч зөвтгөсөөр. Гоолын хялбархан боломжууд олноор нь хийсгэж тэр тоолондоо илүү хүчилж, түүндээ өөрөө хүлэгдээд байсан ч юм шиг. Уг нь АПОЭЛ, Севийягийн эсрэг дараалсан тоглолтуудад Мэсситэй гайхалтай хамтарч чадах нь тод харагдсан ч гоолууд дутагдсаар. Хэн хэнийх нь сэтгэх чадвар, зөн мэдрэмж үнэхээр олноос онцгой энэ хоёр гоц тоглогч төгс хослол болох нь тэр үеэс мэдэгдсэн.
Эхний хүрэлтүүд тааруу байснаас олон ч удаа бөмбөг алдаж, тоглолтын хэмнэл унагаж тэр бүрдээ шүүмжлүүлж байсан ч Луисито бууж өгсөнгүй. Түүний хувьд ч, Барсагийн хувьд ч бүх зүйлийг мартаж, шинээр эхэлсэн эргэлтийн цэг нь Атлетигийн эсрэг тоглолт. Лео "албан ёсоор" төвийн байр сууриа Луиситод шилжүүлж, Суарес болон МСН, мөн Барсагийн мандан бадрал эхэлсэн нь тэр. Суарес энэ тоглолтонд гоолдоод зогсохгүй хэд хэдэн ганган боломж үүсгэж эргээд ирснээ зарласан ба үүнээс хойш тоглолт нь чанар болон статистикийн хувьд гэрлийн хурдаар зогсолтгүй ахьсан.
Аваргуудын Лигийн шөвгийн 16-д Манчестерт зочлон Барселон клубын төлөөх анхны дабль-аа хийж Ситигээс өнгөрсөн жилийн хариугаа бага ч атугай авсан. Суаресийн хоёр гоол ерөнхийдөө бүх асуудлыг эхний тоглолтоор шийдчихсэн бол шөвгийн наймд ч энэ байдал давтагдсан, гэхдээ илүү сүр дуулиантай, уран гоёор. Эйфелийн цамхгийг нураасан Суаресаар анх удаа бүх күле нар жинхнээсээ бахархсан нь энэ байх. Бүх шүүмжлэлүүд ард үлдэж, түүний Парис дах шоу Европийн хэвлэлийн нүүрүүдийг гоёсон.
Шөвгийн дөрөвт Баерны эсрэг эхний тоглолтонд тааруу байсан ч эцсээ хүртэл тэмцдэг дайчин сэтгэл зүй нь нэгэнт тайвшраад арагш татчихсан байсан Барсагийн гурав дах гоолыг эхлүүлж, финалд хүрэх нь бараг л ойлгомжтой болсон. Ер нь Суаресийн энэ Англид сурсан хүчний тоглолт нь МСН гурвалын хувьд маш чухал. Харьцангуй нялцайчхаад байсан Барселоны довтолгоо илүү биежсэн.
Харин хариу тоглолт бүрэн утгаараа Луиситогийн үнэ цэнийг харуулсан гэхэд хилсдэхгүй. Эхний хагаст хоёр удаа сугарч гарч ирээд аль алинд нь өөрөөс нь илүү байрлалд байгаа Нэй-д дамжуулж хоёр ассист өгсөн нь ээлжит удаагаа түүнийг ямархуу багийн тоглогч, мөн дэлхийн хамгийн бүтээлч довтлогч гэдгийг нь харуулсан. Энэ 45 мин-д тэр ямар чухал тоглогч болохоо үзүүлсэн бол 2-р хагаст түүнийг бэртлийн улмаас сэлгээнд суулгаад бүрэн хамгаалтанд шилжсэн Барса үнэндээ хамгаалалт, довтолгоо аль ч үгүй болсон нь Суарес үнэхээр орлуулшгүй тоглогч гэдгийг, Барсагийн функцийн маш чухал элемент болчихсон гэдгийг нь угтаа тултал мэдрүүлсэн.
Аваргуудын Лигийн финалд хожлын гоол оруулснаар Луиситогийн бүтэлгүй эхэлсэн улирал үлгэр аятай дууслаа. Мэсси бөмбөг аваад довтолгоонд шилжихэд Суарес 9, 10 тоглогч дундаас ганцаараа дараагийн хэдэн хоромд юу болохыг тааж гоолдсон нь гайхалтай.
turuue wrote:Финал уг нь давтаж үзсэн хэрнээ анзаараагүй байж. Энэ 10 тоглогчоос Луисито ганцаараа дараагийн хэдэн хоромд юу болохыг тааж мэдэрчээ, мань хүний сэтгэмж, заль, суу ухаан аргагүй гоц. Суу Билэгт Суарес гэж үнэн юм аа.
Ер нь мань хүн Аваргуудын Лигийн хасагдах шатны учраа бүрд л ямар нэгэн чухал зүйл хийсэн аж. Копа дел Рэй финалд мөн Нэй-д нэг гоол бэлдэж өгсөн бол Эль Класикод довтлогчийн торгон мэдрэмжээр оруулсан гоол нь Лигийн аварга болоход том тус болсон нь гарцаагүй.
Пэпийг явсны дараа хавраас false-9 буюу хуурам 9 номероо бүрэн ашиглаж чадахгүй байсан ба хэрэгтэй үед Мэссид өгөөд ямар нэгэн юм хийхийг нь хүлээдэг болчихсон үед мань хүн ч довтлогчийн хувьд төгсөрчихсөн байсан тулдаа овоо аваад явсан. Суарес шиг мобайл, Мэсситэй ойлголцоод шилжилттэй тоглож чадах довтлогч үгүйлэгдэж байсан хүлээлтийг Суарес нэг мөр эцэс болгосон. Үнэнийг хэлэхэд ийм мобайл довтлогчоор Агуэрог авчрах боломжтой гэж хардаг байсан болохоос Суаресийг нэг л төсөөлж байсангүй, яагаад юм бол доо.
МСН шиг гурван том нэр зохицож эвлэхэд хэн хэнийхээ төлөө хангалттай зүтгэх ёстойг гурвуулаа зөв ойлгож, тус бүрдээ бусдынхаа төлөө өөрийгөө золиослож, тэр чинээгээ бие биесээ хүчирхэгжүүлж дийлдэшгүй довтолгоог үүсгэж, магадгүй бүх цаг үеийн хамгийн шилдэг довтолгооны гурвалыг цогцлоолоо. Суаресийн хувьд булангийн цохилтын хамгаалалт, бөмбөг бүрийн төлөө эцсийн удаа юм шиг тэмцдэг нэхэлтүүд гээд довтолгооны бус элементүүд нь олон талаар нэмэртэй байв. МСН гэсэн шуургыг бусад багууд яахаа мэдэхгүй үймж байгаад, азаар улирал дуусч байж л зогслоо.
МСН үнэхээр шилдэг гурвал, гэхдээ тэр дундаа Мэсси, Суаресийн хослол арай л онцгой. Нэг нэгнээ ойлгож гүйж байгаа нь, жижиг хувилбарууд явж байгаа нь. Хэн хэнийх нь сэтгэмж үнэхээр тасархай болохоор тэр байх. Хамгийн тааварлашгүй, ухаалаг, мэдрэмжтэй хоёр довтлогч нэг дор зэрэгцэхээр ч бужигнуулах юм. Мэсси-Нэймар мундаг хослол, гэхдээ нэг талдаа иртэй. Харин Мэсси-Суарес бол хоёр талдаа иртэй, хамгаалагч нар аль ч талаас нь барихын аргагүй. Мэссигийн дрибль, Суаресийн энэ гараа савчсан, сонин тавилттай гүйлтүүд зурагтаар үзэхэд л учир олддоггүй юм чинь хамгаалагч нарыг бүр бажгадуулдаг байж таарна. Алдарт тайлбарлагч Рэй Хюдсон энэ хослолыг гайхан шагшрахдаа "Мэсси-Суарес гэсэн хослолд Жон Леннон, Пол Маккартни нар ч атаархана" гэсэн нь бий.
Хэдэн сар тоглоогүй гэхэд 25 гоол, 17 ассист гэсэн сайн үзүүлэлттэй. Чадварын хувьд 40, 50, 60 гоол хийгээд боломжтой ч тэр бол дэндүү багийн тоглогч. Магадгүй хэзээ ч нэг улиралд 50 гоол хийхгүй байх, гэхдээ тэр үүнээс хавьгүй үнэ цэнтэй тоглогч байх болно.