Өчигдөр ФА капын 3-р шатны оноолт таарсан Мансфилд таун Ливэрпүүл багууд тоглож Улаанууд 2:1-ээр хожил авч дараачийн шатанд шалгарсан билээ.
Хэдийгээр Улаануудад хожил авчирсан 2 дахь гоолыг Луис Суарэз гараараа засч оруулсан хэмээн маргаан үүссэн боловч Мансфилдийн дасгалжуулагч Пол Кокс үүнд нэг их ач холбогдол өгөхгүй байгаагаа болон Суарэзыг биширч явдаг тухайгаа илэн далангүй өгүүлжээ.
Тэрээр Суарэзийг шүүмжлэхийг хүсэхгүй байгаагаа "Тэр нөхцөлд гараараа санамсаргүй хүрсэн болов уу гэж бодож байна. Тэр бол довтлогч хүн, миний бодлоор бол ямар ч довтлогч амьдралдаа ганц удаа ч гэсэн иймэрхүү гоол оруулж байснаа хүлээн зөвшөөрөх болов уу... Луис бол гайхалтай авьяас, ур чадвартай, үнэхээр үлгэрийн мэт тоглогч. Би түүний тоглолтыг 7 хоног болгон үзэж байхын тулд мөнгө төлөхөд ч бэлэн байна" гэжээ.
Мөн Пол Кокс Ливэрпүүлийн хожлыг шударга бус хэмээн үзэхгүй байгаа тухайгаа "Үгүй ээ, би тэгж бодохгүй байна. Энэ тухай яриад байх ч утга багатай. Яагаад гэвэл манай багийн довтлогч тиймэрхүү байдалд орсон байвал би ч гэсэн эсрэг хандахгүй шүү дээ. Энэ бол Английн цомын тэмцээн, энд л Английн хөлбөмбөгийн үзүүштэй сайхан тоглолтууд өрнөдөг. Заримдаа аз бидний талд байдаг, заримдаа үл ялиг дутах ч тохиолдол бий... Энд гайхалтай тоглолт болсон. Миний хувьд Луис Суарэз шиг гайхалтай тоглогчийг өөрийн талбайд тоглохыг нь харсандаа маш их аз жаргалтай байна" хэмээн мэдэгджээ.
Сүүлийн үед хөлбөмбөгт тоглолтын үеэр болдог ямар нэгэн жижиг асуудлыг хэт нэг тийш гуйвуулан хэвлэл мэдээллээр "гоншигонолдох" болсон энэ цагт Пол Кокс жинхэнэ оддын өвчинд автаагүй жинхэнэ эрчүүдийн спортын хүн шиг, эвдрээгүй "Тосгон зан"-гаараа байгаагаа харуулсан яриа өгсөн нь тун их таалагдлаа. Хожигдсон багийн дасгалжуулагчаас ийм яриа ховор л сонсох байх шүү ер нь...
