by suldees » Mon Sep 18, 2006 4:07 pm
Sugaraa ahiin goy yum olloo unshaarai Barca bolon Realiiin fanatuudaa
Урвагч Дүлзэнгийн ах дүүс Барса Реалд
Испаний алдарт 2 баг . «Барселона» 1899 онд , Реал 1902 онд байгуулагдсан. Эртнээс өстэй энэ 2 багийн тоглолт жирийн тоглолт гэхээс илүү дайн байлдаантай адил болдог. Энэхүү 104 жилийн дайны түүхэнд Барсагаас Реал руу, эсвэл Реалаас Барса руу шилжин орж ирсэн хөл бөмбөгч 10 байдаг гэнэ.
Испаний алдарт 2 баг . «Барселона» 1899 онд , Реал 1902 онд байгуулагдсан. Эртнээс өстэй энэ 2 багийн тоглолт жирийн тоглолт гэхээс илүү дайн байлдаантай адил болдог. Энэхүү 104 жилийн дайны түүхэнд Барсагаас Реал руу, эсвэл Реалаас Барса руу шилжин орж ирсэн хөл бөмбөгч 10 байдаг гэнэ. Гэхдээ энэ 10 бол шууд шилжин ирсэн тоглогчид. Зам зуураа өөр багаар явж байгаад өрсөлдөгч багт орсон хүн бас 10 бий. Тэд хуучин багийн балиашгууддаа урвагч хэмээн нэрлэгдэж , талбайд гарахаасаа эхлээд шүгэлдүүлэн исгэрүүлсээр харьдаг. Бахархмаар ч юм шиг баригдана даа баригдана гэмээр зоригтой энэ Дүлзэнгүүд яагаад төрөвөө? Урвагч гэдэг үг Барселон Мадрид 2 хотод өөр өөрөөр авж хэлэлцэгдэнэ. Мадридаас Барсад ирсэн тоглогч мэдээж урвагч гэж хэлэгдэх ч хөл бөмбөгөөс өөр үед амар тайван аж төрөх боломжтой. Тэгвэл Барсагаас Реал руу орсон тоглогч үхэн үхтэлээ амар заяа үзэхгүй гэхэд болно. Яагаад гэвэл Барсагийхан урван тэрслэгчидийг уучлан өршөөдөггүй.
1. Хосеп САМИТЬЕР Вильялта
Яс үндэс: каталон Байрлал: довтлогч урвасан он: 1932 «Барселона»-д : 1919 – 1932/ 2 удаа Испаний аварга болж , 5 удаа Испаний цомын эзэн болсон. 1920,1924 онд олимпийн тоглолтод оролцсон. «Реал»-д : 1932 – 1935/ 1 удаа Испаний аварга, 1 удаа цомын эзэн. Түүх:Ладислао Кубалог ирэхээс өмнө Барсагийн бүх үеийн шилдэг тоглогч хэмээн нэрлэгдэж байсан домогт хөл бөмбөгч. Луис Суаресийг гарж ирэхээс өмнө Испаний шилдэг тоглогч гэгдэж байсан. Барселон хотод өөрийн нэрэмжит гудамжтай 2 хөл бөмбөгчийн нэг. (нөгөөх нь – Рикардо Замора). Реалд шилжин орсон анхны каталон хүн. 11 наснаасаа Барсагийн хөл бөмбөгийн сургуульд хичээллэсэн Самитьер 1919 онд дэлхийн нэгдүгээр дайн дууссанд зориулсан нөхөрсөг тоглолт дээр анх удаагаа үндсэн багт тоголж, анхныхаа гоолийг хийсэн байна. Тун удалгүй тэрээр багийхаа лидер болж, Каталоний шүтээн боллоо. 1920 ялангуяа 1924 оны олимпийн дараа Европ дахин Самитьерийг шүтэн бишрэж, Европод түүнтэй зэрэгцэх хөл бөмбөгч алга хэмээн шагшин магтаж байлаа. Барса ч тааралдсан бүхнээ бут ниргэсээр Испаний 5 удаагийн аварга болов. Харамсалтай нь дараа нь энэ цолыг нь албаны бус хэмээн үзсэн билээ. Ид шидтэн гэдэг хочтой болсон Самитьер хүний санаанд ормооргүй байрлалаас үнэхээр бишрэм гоол оруулдаг байв. Өнгөрсөн зууны хориод он Каталонд үндэсний сэргэн мандалын үе байж, тэр хөдөлгөөний гол цөм нь Сальвадор Дали, Пабло Пикассо, Антонио Гауди тэгээд «Барселона» байлаа. Үндэсний үзэл улам бүр газар авсаар , 1925 оны 6 сарын 14 нд Барсагийн балиашгууд Испаний сүлд дуулалын үеээр шүгэлдэн эсэргүүцсэн тул засгийн газраас багийн стадионыг хагас жил хаан, Барсаг үндэслэгч Жоан Гамперийг багаас хөөсөн байна. 5 жилийн дараа Гампер Швейцарт ихэд сэжигтэйгээр амиа алдсан билээ. Каталонд Самитьерийг ямар ч хэрэг өдүүлсэн бүхнийг тэвчдэг байв. Тэр байтугай ижил хүйстэнтэйгээ явдагийг нь ч хүн болгон мэдэхгүй дүр үзүүлдэг байв. Алдарт бүжигчин Карлос Гардел, францын жүжигчин Морис Шевальетэй явалддаг талаар нь ч Каталоний сонингууд нэг үг ч дурддаггүй байлаа. 1929 онд Барса анхныхаа албан ёсны испаний аварга цолоо хүртсэний дараагаар Саминтьес багийн удирдлагатай муудалцаж эхэлсэн. Бэлтгэл сургууль дээр хоцорж ирдэг, хүч чадлаа дайчилдаггүй, дасгалжуулагчийг дарамталж үндсэн багийн бүрэлдхүүнийг шийддэг гээд л олон гомдол түүний талаар гарж ирсэн. Тэр үед багийн удирдлагад ихээхэн нөлөөтэй байсан Жоан Кома Сарасолс 1932 онд Самитьерийн гэрээ дуусангуут энэ хөл бөмбөгч багийн доторхи уур амьсгалыг муутгаж байгаа, Барса дахь түүний үе дууссан хэмээн зарлаад хоёр дахин бага цалингаар 3 жил гэрээ байгуулахыг санал болгосон. 30 настай Самитьер үүнийг сонсоод галзуурталаа уурласан гэдэг. Яг тэр орой нь Реалаас утас ирж, гэрээ байгуулах санал тавихад уур нь гарж амжаагүй тэгээд согтуу байсан Самитьер зөвшөөрж, маргааш нь Реалд орж орхисон байна. Каталон даяараа энэ мэдээг сонсоод шоконд оров. Барселон хот арай ч дээ хэмээн эргэлзэж байлаа. Жоан Кома сонин хэвлэлээр Самитьерийг урвагч хэмээн нэрлэв. Барсагийн балиашгууд Самитьерийн урьд байгуулсан гавьяа зүтгэлийг төдийгүй хоорондоо хөл бөмбөг ярихдаа ч нэрийг нь дурсахгүй байхаар шийдэцгээсэн байна. Самитьер Реалд очоод анхныхаа жилдээ л Испаний аварга болон цомын эзэн болсон байна. Иргэний дайны үед Францын Ниццад тоглосон Самитьер 1943 онд зодог тайлаад төрөлх Барселон хотдоо буцан иржээ. Бөмбөгдөлтөд өртөн эвдэрж нурсан нутгаа харсан Самитьер биеэ барьж чадалгүй уйлан хотын гудамжаар найган алхаж байсан гэдэг. Хотын төв зам дээр машины хөдөлгөөн хаан өвдөг сөхрөн сууж, мөргөл үйлдэн төрөлх хотоосоо уучлал гуйн уйлан суух түүний хажууд олон мянган хүн цугласан ч хэн ч юу ч хэлээгүй гэнэ. Барсагийн стадионд орох гэсэн түүнийг цагдаа нар хөөснөөр Самитьер Мадрид яван Атлетикогийн дасгалжуулагч болжээ. Төрөлх багаа дасгалжуулахыг олон жил гуйсны эцэст нэг юм зөвшөөрөл авсан Самитьер 1945 онд Барсаг Испаний аварга болгосон нь Барса 16 жилийн дараа авсан цом байв. Удалгүй тэр Барсагийн менежер болж үхэн үхтэлээ энэ албан тушаалдаа ажиллажээ. 1972 оны 5 сарын 5 нд Барсагийн стадионоос таяг тулсан өвгөн гарж ирлээ. Хэдхэн алхаад л өвгөн унасан ба эмч нар зүрх нь зогсжээ гэсэн онош тавьжээ. Нас барахаасаа 30 хан минутын өмнө Самитьер Ринус Михелстэй уулзаж, Голландын Йохан Кройфыг Барсад авах талаар гэрээ байгуулсан байлаа. Ийнхүү Барсагийн түүхэн дэх хамгийн алдарт домогт хөл бөмбөгчдийн нэгний амьдрал дуусжээ.
2. Хусто ТЕХАДА Мартинес
Яс үндэс: испани Байрлал: довтлогч, хагас хамгаалагч Урвасан он: 1961 «Барселона»-д: 1953 – 1954, 1957 – 1962/ Испаний 2 удаагийн аварга, 3 удаа цомын эзэн, 2 удаа УЕФА гийн цом авсан. «Реал»-д: 1961 – 1963/Испаний аварга, 1 удаа цомын эзэн. Түүх: Пелайогийн их сургуулийн багт тоглодог байсан Техадаг Барса авах үед тэр 19 настай байлаа. Анх Каталоний Европа гэдэг баг авах гэж байсан боловч Барсад зарсан байна. Гэхдээ зарсан гэхэд бас хэцүү. Учир нь Техадаг авбал ав. Харин манай стадионд том гэрэл 4 ийг тавьж өг гэсэн болзол Европа тавьсан байна. Барсад орсон анхны жилээсээ Техада үндсэн бүрэлдхүүнд тоглон 19 тоглолтод 13 бөмбөг оруулсан байна. Гэвч 1961 онд Аваргуудын лигэд ялагдсаныхаа дараа багийн удирдлага шилдэг тамирчидаа халж, залуу баг бүрдүүлэх шийдвэр гаргасан. Чөлөөт агент болсон Техадаг Альфредо ди Стефано Реалд орохыг ятган зөвшөөрүүлжээ. Техада – Иргэний дайн аль эрт дууссан тул намайг урвагч гэж нэрлэхгүй байхыг хүсье. Би үхэн үхтэлээ Барсагийн фэн байх болно. Гэвч баг маань намайг гудамжинд хаялаа. Дэлхийн шилдэг багуудын нэг намайг дуудаж байхад би яаж татгалзах вэ. Би Барсагаас биш Барса надаас урвасан хэмээн Реалд шилжсэн шалтгаанаа тайлбарлажээ. «Реал»-д 2 жил тоглон 1962 оны аваргуудын лигийн шилдэг бомбардир болоод Техада Реалыхан гэрээгээ сунгах гэсэн боловч сунгаагүй. Миний гэр Барселон. Гэртээ харьлаа гээд Реалыг хаясан Техада Эспаньолд оржээ. Испаний шигшээд тэр 8 хан тоглосон. Яагаад гэвэл тэр үеийн Испанид Кубала, ди Стефано, Хенто, Суарес , Пейро гэсэн алдарт довтлогчид байсан. Барсад 266 тоголж, 137 бөмбөг оруулсан тоглогч.
3. ЭВАРИСТО де Маседо
Яс үндэс: бразил Байрлал: довтлогч Урвасан он: 1962 «Барселона»-д : 1957 – 1962/Испаний аварга, цомын эзэн. УЕФА цомыг 2 удаа. «Реал»-д : 1962 – 1964/Испаний 2 удаагийн аварга. түүх: 1960 оны 11 сарын 28. Аваргуудын лигийн хагас шигшээ тоглолт. Өрсөлдөгч баг нь Реал. «Камп Ноу» цэнгэлдэхэд зүү орох зайгүй байсан гэнэм. Албан ёсны тоогоор 120 мянган хүн үзсэн гэх ба Европод энэ нь рекорд амжилт юм. Мадридад болсон эхний тоглолтод тэнцсэн 2 баг Барселонд 82 дахь минут хүртэл 1-1 тэнцэж явлаа. Энэ үед Эваристо мөргөн гоол хийж Барсаг шигшээ тоглолтод гаргасан юм. Эваристо де Маседог «Фламенго»-д байхад нь Европын шилдэг багууд ангуучилж байсан боловч дээр дурдсан Самитьерийн ачаар Барсад орсон. Энд тэр 5 жил тоглохдоо 228 тоглолтод гарж, 175 гоол хийсэн. Мөн 14 удаа хет-трик хийсэн байна. Харин Испаний цомоор нэг ч тоглоогүй онцлогтой. Тэр үед Испаний иргэн болоогүй бол тоглуулдаггүй байсан бөгөөд Эваристо Испаний иргэн болохыг ер хүсэхгүй байв. Багаас харьяалалаа солио, тэглээ гээд чи Бразилийн шигшээдээ тоглосоор л байх болно гэж хэлсээр байсан ч Эваристо зөвшөөрсөнгүй. 1961/62 оны улирлын сүүлээр Барсагийн ерөнхийлөгч Лаудет түүнд хэрэв чи Испаний иргэн болохгүй бол гэрээгээ сунгахгүй хэмээн хэлсэн боловч амжилт олоогүй тул гэрээгээ сунгасангүй. Урьд нь Техадаг салгаж чадсан Реал ч энэ бүхнийг зүгээр хараад суусангүй , шууд л Эваристог багтаа авлаа. Гэхдээ Техада ч Эваристо ч Реалд суурьшиж чадаагүй. Тэд үргэлж багийхантайгаа муудалцан, балиашгуудтай ч эв түнжингүй байв. Техадо сайн тоголж байсан тул Техадог Реалыхан тэвчдэг байсан ч Эваристо Реалд олигтой тоглолт ер үзүүлсэнгүй. Удалгүй зодог тайлан нутагтаа харьж өмгөөлөгч болсон байна.
4. Фернандо ГЮЙВЕРТС
Яс үндэс: бельги Байрлал: хамгаалагч Урвасан он: 1965 «Барселона»-д: 1962 — 1965/Испаний цом нэг удаа. «Реал»-д: 1965 – 1967/ Аваргийн цом ,испаний аварга. Түүх: Бельгийн хөл бөмбөгийн хамгийн ирээдүйтэй тоглогч гэгдэж байсан Гюйвертс Ладислао Кубалагийн тушаалаар 1962 онд Барсад орж байв. Харамсалтай нь үргэлж гэмтэж бэртсээр 5 жил болохдоо 16 хан удаа тоглосон байна. Барсагаас гараад Реалд орж олныг гайхуулсан ч бас л гэмтэл бэртэл. Реалаас гараад жижиг баг хэсэж явсаар зодог тайлсан.
5. Люсьен МЮЛЛЕР
Яс үндэс: франц Байрлал: хагас хамгаалагч. Урвасан он: 1965 «Реал»-д : 1962 — 1965/ Испании 3 удаагийн аварга. «Барселона»-д : 1965 – 1968/ УЕФА гийн цомын эзэн. Түүх: Люсьен Мюллер 3 жил Реалыг авж явсан. Хамгаалалтад сайн бөгөөд зарим үед найруулагч ч хийдэг байв. 1965 онд 35 хүрсэн Мюллерт Реал гэрээгээ сунгахыг санал болгосон ч зөвшөөрсөнгүй. Гадаад хүнийг ч хэлэх үү ,ер нь угаасаа Реал таалагдаагүй болтой. Барсатай гэрээ байгууллаа. Энэ үед Каталонид Мюллертэй яаж харьцах вэ гэдэг дээр балиашгууд эргэлзэж байлаа. 63 жил дайсагналцаж байгаа энэ үед анх удаагаа Реалаас Барсад тоглогч ирлээ. Яах вэ гээд л . Барсагаас энэ үед балиашгуудад хандан Мюллерийг доромжилохгй байх, юм хум шидэхгүй байх болон аль болох дэмжихийг уриалсан хуудас тараасан байна. Мюллерийн Барсад хийсэн анхны бэлтгэл дээр маш олон хүн цуглан , дайсны багаас манайд ирдэг хэн бэ хэмээн харж байсан ч удалгүй Мюллер тоглолтоороо бүгдийг өөртөө татаж чадсан. Энд 3 улирал тоглоод Барса гэрээгээ сунгахыг санал болгосон ч дасгалжуулагч болохоор шийдсэн гээд татгалзсан. «Бургос» , «Кастельон» багуудыг дээд зиндаанд оруулсаны дараа Барсад ирсэн ч 10 сар болоод л халагдсан.
6. Бернд «Архитектор» ШУСТЕР
Яс үндэс: герман. Байрлал: хагас хамгаалагч. Урвасан он: 1988 «Барселона»-д: 1980 — 1988/Испании нэг удаагийн аварга. Испаний цом 3 удаа, Цомтонгуудын цом 2, Испаний супер цом нэг удаа. «Реал»-д 1988– 1990/Испании 2 удаагийн аварга, Түүх: Дэлхийн хамгийн авьяастай , гэхдээ хамгийн содон тоглогчийн нэг. 17 настайдаа л Шустер супер од болсон байлаа. 21 настайдаа Барсад орох үед нь Герман орон Шустергүй байж чадахаа байсан байв. 140 сая песетийн үнэ хүрсэн нь тэр үед хөл бөмбөгийн түүхэнд гараагүй мөнгө байжээ. Шустер өөрөө яагаад Барсад ирсэнээ гадаадад тоглох хүсэлээс гадна дасгалжуулагч Хердеготтой таараагүйгээс болсон гэж тайлбарласан. 1980/81 оны улиралд амжилт муутай тоглож байсан Барсад Шустер ирээд багийн тоглолт шууд сайжирсан. Барсагийн алдарт довтлогч Кинитэй үнэхээр хөл нийлж , ямар ч өрсөлдөгч байсан арчин хаядаг байлаа. Талбайг бүхэлээр нь харж , тоглолтыг уншиж чаддаг, залуу гэлтгүй ухаалаг Шустер үнэхээр сайн тоглогч байлаа. Гэвч Барсагийн дайснууд Киниг хулгайлж барьцаанд авсанаар Барса сэтгэл зүйн дарамтад орж аварга болж чадаагүй. Гэвч Испанид ирсэн анхны жилээ л олныг бишрүүлсэн Архитектор дараа жил заавал Испаний аварга болно гэж балиашгуудад амаллаа. Харамсалтай нь энэ амлалт бүтсэнгүй. 12 сард Атлетикийн алуурчин хочит Гойкоечеа Шустерийн хөлийг хугалан эмнэлэг явуулж орхилоо. 1982 онд Нуньес Диего Армандо Марадоног худалдан авав. 2 супер од ,тэр тусмаа ааш зангаараа алдаршсан хоёр од хоорондоо таарахгүй, удахгүй муудалцана гэж хүмүүс зөгнөж байсан ч гайхалтай нь Диего Шустер хоёр сайн найзууд болцгоосон. За одоо л нэг юм аварга болно гэж бодсон ч Марадона өвдөж эмнэлэгт хэвтэн бас л зорилго биелсэнгүй. Харин цомын тэмцээнээр Реалыг хожсон байна. Шустерийн Барса дахь 4 дэх улирал Марадона Шустерийн хослол дэлхийд гайхагдаж байсан ч дахиад л нөгөө Гойкоечеа энэ удаа Марадонаг хугалж орхилоо. Бас л амжилтгүй. Заавал нэг гай гарж ирэх юм хэмээн Шустер уурлаж байлаа. Ирэх жил нь Барсад өөрчлөлт явагдлаа. Марадона Кини нар багаас гаран, Английн Терри Венейблс дасгалжуулагчаар ирж, Шотландын Арчибальд тэргүүтэй шинэ тоглогчид орж ирэв. Кини Марадона мэтийн алдарт хөл бөмбөгчид алга болсоноор Барсагийн цорын ганц супер од нь нь Шустер байлаа. Сонин хэвлэлээр ганц Архитектор, 10 хар ажилчин гэж нэрлэгдсэн Барса гайхалтай нь Испаний аварга болж чадав. Каталонд хийсэн парадын үеээр Шустер ирэх жил аваргуудын лигийн цом авчирна гэдгээ амаллаа. 1986 онд Барса үнэхээр аваргуудын лигэд түрүүлэх шахсан. Шигшээ тоглолт Испаний Севильяд болохыг хэлэх үү, өрсөлдөгч нь Румыний Стяуаг хэлэх үү. Довтолсоор довтолсоор гоол хийж чадахгүй байсан Барсагийн дасгалжуулагч Венейблс Шустерийг сэлгээгээр солих шийдвэр гаргасан. Архитектор уурлан талбайгаас гарахдаа дасгалжуулагч руугаа алчуур цамцаа шидэн, усанд ороод л шууд гэртээ харьсан байна. Барса 11 метрийн цохилт хийгээд Стяуад хожигдсоныг тэр талбайд харсангүй. Каталон даяар Шустерийг шүүмжилж, Нуньес Шустерийг хөөнө гэдгээ зарлав. Гэвч Шустерийг хөөсөнгүй ,харин Венейблсийг багаас халлаа. Шинэ дасгалжуулагч Луис Арагонес. Энэ үед шагнал мөнгө цагтаа өгсөнгүй , захирлууд хэт их эрх мэдэлтэй байна гэмээн Барсагийн хөл бөмбөгчид бослого гаргав. Хачирхалтай нь Шустер багийн ахлагч Мигелтэй хамт энэ бослогод оролцсонгүй. Шустер 1988 онд Испаний цомын финалд хамгийн сүүлийн удаа Барсад тоголсон. Балиашгууд болон багийн удирдлагатай муудалцан, мөн шинээр ирсэн Гарри Линекэртэй зодолдоод Шустер 29 насандаа Реалд орох гэрээ байгуулсан. Тэр ч нэг иймэрхүү урвалт хийх гээд байсан юм гэж дараа нь ерөнхийлөгч Нуньес хэлнэ. Мадридад Шустер ирсэнээр Реал Бутрагеньо, Уго Санчес гэсэн 2 супер довтлогч, дээр нь Мичел Шустер гэсэн найруулагчтай болж , ялагдашгүй багийн хэмжээнд хүрсэн. Гэвч Бернд Шустер зүгээр байсангүй. Сэтгүүлчид дуртай багийг нь асуухад Барса гэж хариулан, сэтгүүлчдэд Барсагийн клубын үнэмлэхээ харуулах зэргээр дураараа аашилж байв. Мадридад 2 жил маш сайн тоголсоныхоо дараа Шустер Барсад буцан орох гэж оролдсон боловч татгалзсан хариу аван мадридийн Атлетикод орсон. 1997 онд мексикийн «Универсидад»-д тоглоод 38 настайдаа зодог тайлжээ. Барсад 301 тоголж 117 гоол хийсэн.
7. Луис МИЛЬЯ Аспас
Яс үндэс: испани Байрлал: хамгаалагч. Урвасан он: 1990 «Барселона»-д: 1984 — 1990/ Испаний аварга, Цомтонгуудын цом болон Испаний цом нэг удаа. «Реал»-д : 1990 – 1997/ 2 удаа Испаний аварга, испаний цом нэг удаа. түүх: Луис Милья 18 настайдаа Барсад ирээд үндсэн тоглогчид гэмтэлтэй байсан тул шууд л талбайд гарсан тоглогч. Испанид гадаадын хөл бөмбөгчдийг тойрсон маргаан гарж, легионерууд нэг хэсэг тоголж чадахаа байсан тэр үед Милья боломжийг ашиглан үндсэн бүрэлдхүүнд багтаж чадлаа. Йохан Кройф дасгалжуулагчаар ирсэнээр Милья хамгийн найдвартай хамгаалагчаар сонгогдож, Цомтонгуудын цомын тэмцээнд түрүүллээ. Багаас Мильяд сайжруулсан гэрээ байгуулах болзол тавьсан ч тэр хариу хэлэхээ яарсангүй. Удалгүй тэвчээр нь барагдсан Йохан Кройф яах гээд байгааг нь асууснаар маргалдан, Кройф Мильяаг талбайд гаргахаа болисон. Энэ бүхнийг харж байсан Реалын ерөнхийлөгч Рамон Мендоса агентуудаа түүнрүү явуулна. Барселонд Милья Реалтай хэлэлцээ хийж байгаа гэдэг нь мэдэгдсэнээр гудамжаар алхах ч аюултай болсон байна. Гэрийхэн нь нутагруугаа буцаж, Милья өөрөө зочид буудалд нуугдаж байв. Шуудангийн хайрцаг нь Реалтай хийж байгаа хэлэлцээгээ зогсоохгүй бол гэрий чинь шатаана зэрэг сүрдүүлсэн захиагаар дүүрж, амь насанд нь ч заналхийлж байв. Энэхүү маргаанаас болон удаан хугацаагаар талбайд гараагүй Мильяаг шигшээгийн дасгалжуулагч Луис Суарес 1990 оны ДАШТ д авж явсангүй. 1990 оны 6 сарын 30. «Реал» Барсагаас Мильяаг 300 сая песетээр худалдан авлаа. Реал Барсагаас худалдаж авсан анхны хөл бөмбөгч Милья болсон юм. Урьдах урвагчид дандаа чөлөөт агент болсон хойноо дайсныхаа багт шилжиж байв. Испаний шигшээд 5 хан удаа тоглоод 36 настайдаа зодог тайлсан байна. Урваагүй бол шигшээд олон тоглох байсан нь гарцаагүй.
8. Михаэль ЛАУДРУП
Яс үндэс: дани Байрлал: хагас хамгаалагч Урвасан он: 1994 «Барселона»-д: 1989 — 1994/Нэг удаа Аваргийн лийг, 4 удаа Испаний аварга болсон. , Европын супер цом, Испаний цомын эзэн. «Реал»-д: 1994 – 1996/ Испаний аварга. Түүх: 1986 оны ДАШТ- д тэр үед 22 настай байсан Лаудруп дэлхийн шилдэг хөл бөмбөгчийн нэг гэдгээ харуулсан. «Брондбю» гаас «Лацио» руу, тэгээд «Ювентус» т шилжсэн ч , Лаудруп Италид идээшсэнгүй. 1989 онд Йохан Кройф түүнийг 220 сая песетээр худалдан авсанаар Лаудруп шинэ төвшинд гарсан гэж хэлж болох юм. Яг энэ үед Барсад Рональд Куман ирсэнээр Кройфын алдарт Dream Team үүснэ. Ла Лигэд 4 дараалан түрүүлж, аваргуудын лигийн цомыг авсанаар Лаудруп супер од болон хувирлаа. Багийн удирдлагатай муудалцаж эхэлсэн нь 1993-1994 оны улирал. Куман, Стоичков, Ромарио, Лаудруп гэсэн хүчит легионерүүд цугласан байв. Талбайд 3 хан легионер гарж болох тул Кройф ихэнхдээ 30 настай Лаудрупыг суулгаж байлаа. Кройф энэ шийдвэрээ Лаудрупын байрлалд хамгаалалтад сайн Пеп Гвардьола илүү тоглож чадна хэмээн тайлбарлаж байв. Мэдээж хэрэг Лаудрупад энэ нь таалагдсангүй. Гэрээ дуусаж байгааг хэлэх үү, өөр багаас урилга хангалттайг хэлэх үү багаас явахаар шийдлээ. Тэр олон урилга дотроос Лаудруп Реалыг сонгосон юм. Дараа нь тэрээр Кройфийг уурлуулахын тулд ийм алхам хийсэн гэдгээ хэлнэ. Мадридад ирсэн анхныхаа жилээ л Лаудруп Барсагийн ноёрхолыг таслан шинэ багаа аварга болгов. Реалд орсоныхоо дараа Барсатай тоглохоор «Камп Ноу» д ирсэн Лаудрупыг стадион дүүрэн Иуда, Урвагч гэж бичсэн плакат, балиашгуудын хилэнт дуу хоолой угтлаа. Лаудруп энэ бүхнийг тэсэж чадсангүй, 2 р үед өөрөө сэлгээнд суухыг хүссэн байна. Барсад тэр 297 тоголж, 98 гоол оруулсан. Даний шигшээд 104 тоглолт хийн 36 бөмбөгөөр өрсөлдөгчийхөө хаалгыг мялаасан байна. 1992 онд Европын аварга болсон. 2000 онд Даний хатан хаан 2 р Маргарита Лаудрупт спортод гаргасан гарамгай амжилтыг нь үнэлэн рыцарын одон гардуулжээ.
9. ЛУИС ЭНРИКЕ
Яс үндэс: астур Байрлал: довтлогч, хагас хамгаалагч Урвасан он: 1995 «Реал»-д: 1991 — 1996/Испаний аварга, Испаний цомын эзэн. «Барселона»-д: 1996 – 2004/Испаний 2 удаагийн аварга. 2 удаа Испаний цом, Цомтонгуудын цом, европын супер цом тус бүр нэг удаа. Түүх: Анхнаасаа Реалын удирдлагатай таардаггүй байсан Луис Энрике 1995 онд сонинд нэгэн ярилцлага өгсөн нь түүний хувь заяаг эргүүлнэ. – Барсад гоол хийхдээ юу боддог вэ гэж үү? Бусад багт гоол хийж байгаатай л адилхан жирийн л гоол. Би Спортингийг шүтдэг. Спортингийн удаах дуртай баг гэвэл Барса гэж хэлсэнийхээ дараагаас Луис Энрике багийхаа балиашгуудад шүгэлдүүлж эхэлсэн. Ирэх зун нь Луис Энрике Барсад орсон нь Мадридад бөөн шуугиан тарьлаа. Каталончууд мэдээж Реалаас сайн тоглогч салгаж чадсандаа баяртай байсан ч манайд тоглож чадах болуу яах бол хэмээн эргэлзэж байв. Гэвч хамгийн анхны албан ёсны тоглолтыг үзээд бүгд найдвартай тоглогчтой боллоо гэдэгт итгэсэн. Испаний аваргийн эхний тойрогт «Овьедо» гийн талбайд 2 гоол оруулсан Христо Стойчковын оронд талбайд гаран бас л 2 гоол хийж 4-2 р хожсон. Ингээд түүний Барса дахь урт удаан аян эхэлсэн юм. Барсад ороод хуучин Реалтайгаа хийсэн анхны тоглолт нь 1996 оны 12 сарын 8 нд «Сантьяго Бернабеу» д боллоо. Луис Энрике шүгэлдүүлж исгэрүүлэн, элдвээр хэлүүлнэ гэдгээ мэдэж байв. – Би Лаудруп „Ноу Камп“ д байсан шиг миарахгүй. Би Барсагийн төлөө алалцана. Би өнөөдөр ялах болно гэж тоглолтын өмнөх хэвлэлийн бага хурал дээр Луис ярьж байв. Харамсалтай нь хожиж чадаагүй. Надаль, Роналдо, Гвардьола нарын цохилт хөндлөвч цохиж азгүйтсэнээр 0-2 ялагдаж орхив. Барсад ирсэн анхны улирлаасаа Луис үндсэн бүрэлдхүүнд орон Рональдотой цуг довтолж байлаа. Робсон дасгалжуулагч ганц довтлогчтой тоглож эхлэнгүүт Луис Энрике хагас хамгаалалтад шилжсэн ч анхныхаа жил л 16 гоол хийсэн нь баг дотроо Роналдогийн дараахь үзүүлэлт байлаа. 1997–1998 онд «Барса»-д Луи ван Галь ирсэнээр ихээхэн өөрчлөлт хийгдсэн ч Луис үндсэн бүрэлдхүүнд тоглох уу үгүй юу гэдэг хэний ч эргэлзээг төрүүлсэнгүй. Луис талбайн төвд найруулж, зүүн талд нь Ривалдо, баруун жигүүрт нь Фигу гүйж байлаа. 1997 оны 11 сарын 2 нд Барса Реалтай тоглохоор Мадридад ирлээ. 5 дахь минутад Ривалдо гоол хийсэн ч 49 дэх минутад Реал хариу бариад дошин дээрээ хожихоор довтолж эхлэв. Энэ үед Барса сөрөг дайралт хийлээ. Бөмбөгөнд хүрэх болгондоо шүгэлдүүлж байсан Луис Энрике талбайн төвд бөмбөг булаан авангуутаа 2 хамгаалагчийг хууран гүйсээр 16 метрийн талбайн гаднаас хүчтэй өшиглөлөө. Бөмбөг Реалын хаалганд нисэн орж, Луис Энрике Реалын балиашгуудруу хандан нударга зангидан, хашгарж гоолоо тэмдэглэж байсан нь олон хүний санаанд байгаа байх. – Юу гэж хашгарж байснаа одоо санадаггүй гэх ба би астур хүн. Гэхдээ би Каталонд амьдарж байгаа болохоор бага зэрэг ч гэсэн каталон хүн. Тэдний эрх чөлөөнд дуртай, үзэл бодол нь миний зүрхэнд үүрд байх болно гэж нэгэн сонинд ярьсан байна. Удалгүй тэр хуримаа хийсэн бөгөөд эхнэр нь мэдээж каталон. Барселоны алдарт Санта-Мария-де-Мар сүмд хуримаа хийсэн хосуудад Барсагаас хотын төвд том байр бэлэглэсэн бол багийн нөхөд нь Луист Мерседесийн шинэ загвар өгсөн байна. Барсад төдийгүй шигшээ багт ч лидер болсон Луист өөр багаас хичнээн санал ирж байсан ч – Би энд аз жаргалтай байна. Барсад зодог тайлахыг хүсэж байна хэмээн хариулсаар ирсэн. 2000 оноос Гаспарын үе эхлэн Барса ганц ч цом авж чадалгүй балиашгууд бухимдаж байсан үе. Луис Энрике хэвлэлийн бага хурал зарлан хуралдуулж, балиашгуудыг багаа дэмжихийг хүссэн. – Ийм л хүнд хэцүү үед та бүхний дэмжлэг бидэнд юунаас илүү хэрэгтэй байна. Тиймээ. Гвардьола өөр баг руу явсан. Гэхдээ тэр үүрд бидний сэтгэл зүрхэнд байх болно. Бид Барса хэвээр, та бүхэн Барсагийн фэн хэвээр байна. Багаа дэжмжицгээе хэмээн уриалж байлаа. Луис Энрике шинэ лидер, шинэ шүтээн болсон байв. Нас ч ахиж, туршлага суун урьдын халуун омголон зан нь алга болжээ. Багийн ахлагчийн хувьд үүрэг хариуцлага нэмэгдсэнээр Реалд хичнээн гоол хийсэн ч балиашгуудыг нь өдөөн хатгахаа больсон байна. 2002 онд Луи ван Галь дахин Барсад ирэхэд Луис Энрике Галийг үзэн яддаг балиашгуудад хандан тэвчээртэй байхыг уриалж, дасгалжуулагч тоглогчдын маргааныг эвлэрүүлэн зохицуулж байлаа. Ривалдо Серхи нарыг багт үлдээж чадаагүй ч түүний ачаар баг оршин тогтнож байна гэхэд болохоор байлаа. 2002-2003 оны улирлаас фэнүүд Луис Энрике хуучин шигээ хурд хүчгүй болсоныг анзааран удахгүй Луиса Энрике маань зодог тайлах нь дээ хэмээн ойлгож эхлэв. Сэлгээнээс тоглолтод орох нь ихэсж байсан ч гарж ирэнгүүтээ л ажлаа үлгэр жишээч хийн маш олон хэцүү тоглолтыг аварж байсан. Юм болгон дуусах жамтай. Барсагийн хувьд Луис Энрике хэн байсан бэ гэдгийг ойлгохын тулд элдэв тоо баримт дурдах хэрэггүй, ганц тоглолт дурсахад л хангалттай. 2004 оны 5 сарын 16 нд Луис Энрикэ сүүлийн тоглолтдоо оролцоод зодог тайлсан. Испаний лигт 400 удаа тоглохдоо 300 г нь Барсагийн бүрэлдхүүнд хийжээ. 54 дэх минутад Луис ахлагчийн туузаа авж байхыг харсан балиашгууд Луис Энрике! Луис Энрике! гэж хашгаран цэнгэлдэх тэр аяаараа босож, амьд домогт хүндэтгэл үзүүлсэн. Өрсөлдөгч багийн тоглогчид ч алаг ташин Луис багийхантайгаа тэврэлдсэний эцэст балиашгуудад мэхийн хүндэтгэл үзүүлээд сэлгээний суудалд суусан. Энэ үед л Барсагийн балиашгууд ямар тоглогчоо алдаж байгаагаа яс махандаа тултал ойлгосон байх. Урьд нь Луис талбайд гараагүй ч бүгд Луис сэлгээнд байгаа, хэцүүдвэл гарж ирээд туслана, багаа ялуулна хэмээн итгэж байдаг байсан бол одооноос эхлээд Луис сэлгээний сандалд ч байхгүй болно. Испаний шигшээд Луис Энрике 62 тоглож, 1992 оны олимпийн аварга болсон.
10. Луиш Фелипе ФИГУ
Яс үндэс: португал Байрлал: хагас хамгаалагч Урвасан он: 2000 «Барселона»-д: 1995 — 2000/Испаний аварга шалгаруулах тэмцээн болон цомын аварга. , Цомтонгуудын цом болон супер цомын эзэн. «Реал»-д: 2000 — 2005/ Аваргуудын лигад нэг удаа, Испаний аваргаар 2 удаа шалгарсан. Супер цом болон тив хоорондын цомын эзэн. Түүх: Реалын шинэ ерөнхийлөгч Флорентино Перес Зидан Фигу хоёрын аль нэгийг авна хэмээн зарлаж, Барсагийн балиашгууд хилэгнэж байсан үе. 2000 оны 7 сарын 23 нд Луиш Фигу хэвлэлийн бага хурал хийлгэн – Би хаашаа ч явахгүй . Реалд юу гэж очих вэ, инээд хүрмээр юм. Хэрэв би Реалд орвол дараа нь та нарын царайг яаж харах билээ хэмээн фэнүүдээ тайвшруулав. Ингэж ярьж байхад нь хармаанд нь Реалтай хийсэн урьдчилсан гэрээ байсан гэхээр Фигу бол ёстой Дүлзэнгүүдийн доторхи Дүлзэн юм. Маргааш нь л Фигу Мадрид нисэн Реалтай гэрээ байгууллаа. Фигугийн Барсатай хийсэн гэрээнд заасан байсан мөнгийг Реал шилжүүлсэн тул Барса юу ч хийж чадсангүй. 56,1 сая доллар Барсад төлөөд Реал Фигутэй 3 жилийн гэрээ байгуулсан. Барсад жилд 3 сая ногоон авдаг байсан бол Реалд 4,5 сая авах болсоноос гадна бэлнээр 2 сая доллар авжээ. Фигугийн бас нэг хүсэл болох 10 ноймэрийг ч Реал өгсөн байна. Түүнээс гадна том байшин авах гэснийг нь ч биелүүлжээ. Гэрээгээ хийчээд Фигу Португалруу амрахаар явсан бол энэ үед Каталонд балиашгууд уур хилэндээ автаж байв. Фигугийн амьдарж байсан байр луу олон мянган хүн очсон ч байрны эзэн Фигу сарын өмнө нүүсэн гэж хэлсэн байна. 7 сарын 24 нд Барсагийн албан ёсны интернэт хуудас fcbarcelona.com д анх удаагаа саатал гаржээ. Олон мянган майл захиа ирж сайтыг бөглөрүүлсэн байна. Бүх дэлгүүрээс 7 ноймэрийн Фигугийн цамц алга болж, хүмүүс хөл бөмбөг ярилцахаа болин нэг нэгнээсээ дөлж байлаа. Барселоны Sport сонин Урвагч Фигу гэсэн том гарчигтайгаар гарж, 7 ноймэрийн цамц өмссөн хэд хэдэн хүн зодуулсан байна. Зодуулагчид гаднаас ирсэн жуулчид байсан ба тэд Фигуг Реалд орсон гэж мэдээгүй байцгаав. Фигугийн цамцыг шатаан устгах арга хэмжээ болж, орон нутгийн ТВ шууд дамжуулан үзүүлэв. Фигуг ал гэсэн нэртэй онлайн тоглоом гарж, уурласан фэнүүд стрессээ тайлж байв. Барселон хот төдийгүй Каталон муж Фигуг эрхлүүлж байсан гэхэд болно. Хүссэн бүхнийг нь биелүүлж, эхнэр нь ч каталонд аз жаргалтай байна хэмээн ярьдаг байсан. За яахав Барсагийн ерөнхийлөгч Луис Нуньес болон дасгалжуулагч Ван Галь багаас гарсан нь нөлөөлсөн гэж үздэг хүмүүс байдаг ч ихэнх хүн шуналаасаа боллоо гэж үздэг ба тэр нь ч үнэн юм. Батлах гээд оролдоод үзье. 1989 онд португалууд 16 настнуудын ДАШТ д түрүүлсэнээс хойш анх Фигуг мэргэжилтнүүд анзаарсан. 18 настайдаа Фигу Лиссабоны Спортингийн үндсэн бүрэлдхүүнд тоглож эхэлсэн. Бенфика авах гэж оролдсон ч амжилт олоогүй. 1994 оноос Италийн багууд хөөцөлдөж эхэлсэн ч цалин хөлсний тал дээр Фигутай ер тохирж чадахгүй байсаар 1995 он болжээ. Эцсийн эцэст Фигу нэг юм гэрээ байгуулсан ч шуналаасаа болоод “Ювентус“ “Парма“ гэсэн 2 багтаа зэрэг гэрээ байгуулж гарын үсэг зурсан байна. Мэдээж бөөн маргаан болж, ФИФА гаас хоёр гэрээг аль алийг нь хүчингүйд тооцон Фигуг Италийн багтай харьцахыг 2 жилээр хориглосон. Энэ үед Барса гарж ирлээ. Кройф ерөнхийлөгч Нуньестэй уулзан надад Фигу хэрэгтэй гэж хэлсэн гэдэг. 5 хоногийн дараа л Барсагийн агентүүд Фигуг багтаа аваад ирсэн байв. Ингээд л Фигугийн Барса дахь амжилт эхэлсэн хэрэг. Анхны жилээсээ л Фигу цалингаа нэмэхийг хүсэн, жил болгон гэрээгээ шинэчилж урьдахаасаа илүү цалин авж байв. Кройфын үед ч, Бобби Робсон, Луи Ван Галийн үед ч Фигу үргэлж тоглон бүр багийн ахлагч болсон байв. Каталон даяараа түүнийг хайрлаж байсан. Мадридад очоод Фигу хэзээ ч Барсад байсан шигээ балиашгуудад хайрлуулж байгаагүй. Мадридад тэр мөнгө, аваргийн цом авсан байж болох ч алдсан юм нь их байх. Мадрид явахгүй хэмээн худлаа залж байхдаа Фигу Каталоний олон сая фэнүүдийн тухай ер бодоогүй гэж үү? Бодсон ч түүнд мөнгө л чухал байсан нь лавтай. Олон янзын шагнал медаль авсан энэ урвагчийн оргил үе нь 2002 оны Европын аваргийн шигшээ тоглолт болох ёстой байлаа. Дошин дээрээ сулхан Гректэй тоглох болж, португалчууд аварга болно гэдэгтээ итгэлтэй байсан бизээ. Гэвч тоглолтын дундуур Барсагийн балиашиг Жимми Жамп талбайд гарж ирэн Фигугийн нүүр лүү Барсагийн эмблемтэй алчуур шидээд цагдаа нарт баригдан явсан. ТВ гээр үзэж байсан олон сая хүний нүдэн дээр хийсэн нүглийг нь хэлсэн хэрэг. Үнэний цаг ирж Грек ялан урвагчийн баг хожигдсон. 2005 онд Фигу Италийн Интерт шилжсэн. Очингуутаа юу гэж хэлсэн гэж бодож байна? – Реал бол алиалагчид цугласан цирк. Интер жинхэнэ хөл бөмбөгийн баг гэж сонинд ярьсан. Урвагч хүн үхтэлээ урвагчаараа үлддэг гэгч энэ ажгуу.
тэвчээр заа