Аггэр маань хөлбөмбөгөөс явлаа.
2 жилийн өмнө Ливэрпүүлээс явахад нь сэтгэл нэг л хоосроод, гунигтай болчихож байснаа санаж байна. Хамаг л оргил үе, залуу насаа Анфилдад өнгөрүүлсэн Аггэрийг минь зуны солилцооны цонх болгоноор Барса, Байерн гэх мэт мөнгөтэй, том багууд авахыг санаархаж, шүлсээ үсчүүлдэг байж билээ. Гэсэн ч Аггэр яваагүй ээ. Их цалин+Цомоос илүү зүйл хөлбөмбөгт байдаг гэдгийг тэр мэддэг учраас магадгүй яваагүй байх.
2013 оны зун Рожэрс түүнийг хариугүй Барса руу явуулчих шахсныг санаж байна. Барса ч түүнийг идэвхитэй сонирхож, өндөр цалин амлаад, клубын түвшинд бараг л асуудал шийдэгдэх дөхсөн байхад Аггэр маань хуруундаа #YNWA-гаа шивүүлээд, би Барсад чинь очихгүй ээ гэдэг мэдэгдлээ хийчихэж билээ. Лам олдохгүй бол буцахдаа зална гэдэг шиг Барса аргаа бараад Арсэналаас Томас Вермаелэнийг авсан юм даг.
Данийн Брөндби хэмээх даруухан багаас өсөх ирээдүйтэй хэмээн нэрлэгдэн ирж байсан тэрээр Ливэрпүүлд өнгөрүүлсэн 9 жилдээ Класс хамгаалагчийн тоонд ортлоо өсөн дэвжээд, эргээд хуучин баг руугаа даруухан гэгч нь буцаж билээ.
Тэр хэлсэн үг, хийсэн үйлдэл бүрээрээ Ливэрпүүлийн дэмжигчдийг хайрыг татдаг байсан. Тийм болоод ч Копуудын дунд #Домог гэж бардам хэлэгдэх гавьяатай. Аггэртай Ливэрпүүлийн бүрэлдэхүүн хүчирхэг харагддаг байсан, Аггэрийг байхад ардаа алдахгүй юм шиг найдвартай санагддаг байлаа.
Өнөөгийн нийгэм нь ч юм уу, зөвхөн хөлбөмбөгт нь ч юм уу ёстой бүү мэд. Өнгө мөнгө нь давамгайлдаг болсон энэ цагт Аггэр шиг эрчүүд ховордсон юм шиг санагддаг. Түүний хөлбөмбөгийн замнал жинхэнэ эр хүн шиг байсан, урваад явсан нэгэнд нь ухамсрын тохойдолт хүртэл өгч чаддаг тийм л мужик тоглогч байлаа.
Эргээд дурсахад энгэрээрээ дүүрэн ялалтын медаль, олон цом түүнд байхгүй ээ. Гэхдээ эргээд Анфилддаа ирэхэд халуун дулаанаар алга ташуулах тийм л сайхан дурсамжийг тэр үлдээж чадсан юм. Аггэртай Ливэрпүүлийн он цагт амьдарч, дэмжиж байсандаа би л хувьдаа баяртай байдаг. Баяртай #Агуу_Дани минь!!